黄子华 早前落实参演 周殷廷YT 执导嘅首部电影《雨夜之徒》，近排仲不时被网民于香港唔同地方野生捕获佢哋拍戏。而喺10月28号下午，子华同林雪被目击喺红磡殡仪馆对出嘅马路封街拍戏，子华戏中嘅造型亦正式曝光！
一向斯文有型嘅子华，呢次愁眉紧锁、身形更加瘦削，睇上去既落魄又充满倦容，一头凌乱长发同杂乱须根，著住残旧深啡色皮褛，流露出满满沧桑感。而喺拍摄途中，子华突然除外套，露出左手臂大片纹身，视觉效果非常震撼。
作为新晋导演嘅YT喺现场非常认真，一场子华行去林雪方向嘅戏份，YT同子华反复沟通，子华行完又行，全程表情严肃，完全投入角色之中。 
电影自落实开拍后，故事灵感有传系同40几年前轰动全港嘅雨夜屠夫杀人案有关，大家都好想知子华饰演嘅角色究竟系咪变态杀手？但亦有人估佢饰演受害者家属或沧桑刑警。不过一切都要等剧组正式公布先会有真正答案，所以现时仍然充满神秘感。
