张家辉早前接受《一周星星》访问，话希望TVB重播《骗中传奇》。影帝讲得出，TVB就做得到！剧集将于11月2号开始，晚上11点55分喺翡翠台重播，各位观众千祈唔好错过喇！家辉得知呢个消息都好开心，仲话以前重播嘅时候，自己都好钟意睇。
而家辉主演嘅新戏票房报捷，呢日佢同蒙嘉慧、钟雪莹、伍允龙等演员，以及导演齐齐举行庆功宴。家辉之前讲过，如果票房过亿就要裸跑，又预告过千万会同钟雪莹合唱。Yoyo就话唱歌跳舞肯定都唔关佢事，家辉就叫佢讲多啲嘢，不过Yoyo就话惊再发生粗口疑云，所以唔讲嘢。
Yoyo话自己当日完成宣传活动后，同老公郑伊健讲：「哎呀，我出咗事啊！」仲话自己几十年道行一朝丧，俾人听错咗。但在旁嘅家辉就好幽默，话：「错就一定冇错，不过冇所谓嘅大家。」至于伊健有咩反应？Yoyo就话唔记得，但老公不停笑。
讲到票房福利，家辉突然歌瘾起，即场嚟咗一段劲歌热舞，点知被在场传媒提醒唱错咗陈小春嘅歌，令全场爆笑。转数极快嘅家辉，即刻加码再唱一首，点知继续系唱错小春嘅歌，但喺大家提醒后，最后终于唱啱一首《友情岁月》，唱到非常陶醉，令Yoyo笑到好无奈，要佢讲返套戏。
至于谢票活动有冇机会请到伊健？家辉就话叫咗好耐，不过Yoyo唔准。Yoyo解释，因为伊健系I人，所以冇得解。作为搞Gagy高手嘅家辉一听到就即玩食字，话：「过嚟咪俾佢挨住你啰！」令大家笑得好开心。
Philip对新片票房报捷感到开心，不过听到家辉提议裸跑谢票，似乎就唔想奉陪，仲话自己可以睇住家辉哥跑。
