JW王灏儿相隔多年再推出新歌，而呢首歌系道出佢同挚爱 王至尊 嘅爱情故事，新歌歌名取自佢哋嘅英文名简写「JW」。至于今次宣传新歌嘅手法，就好似要同外界公告佢哋嘅婚讯一样，以「派帖」方法宣布与挚爱展开人生新一页，新歌仲要系JW同挚爱Jim Wong王至尊有份监制，真正系属于佢哋嘅「爱情结晶品」。
为宣传新歌，JW喺社交平台上载咗三张相，一张系佢同王至尊喺海边平台上相拥嘅俯拍画面，另一张就系佢身穿红色单肩露腰晚装嘅半身照，最后一张就系新歌嘅宣传帖。之前有报道指JW同王至尊去年秘密喺土耳其结婚，而今次JW放出嘅照片，背景正好似喺土耳其伊斯坦堡嘅Sait Halim Pasha Mansion Venue，另外JW嘅半身单人照中，右手无名指更系戴上巨型钻石戒指，难免令人联想系二人嘅婚戒。而喺JW为新歌发文后，一众圈中好友都纷纷留言恭喜，令呢次派歌更似公告婚讯一样。
JW亲解新歌创作概念：「因为我哋嘅工作会遇到好多唔同嘅挑战，亦要面对好多唔同嘅声音，所以知道对方一定会喺自己身边送上无限支持嘅时候，就会觉得份外感动。至于JW2嘅意思正正系JW乘以JW，当我们互相陪伴、互相扶持嘅时候，力量远远大于JW乘以二，足足大一倍呢！」
JW坦言每句歌词都代表住二人一起走过嘅日子：「最令我感动嘅歌词系『若遇大敌 踏前抵挡 在伤痛里 互相撑过 未怯懦』，勾起无数感动回忆，庆幸自己可以找到一个灵魂伴侣，一起走出伤痛去迎接幸福嘅未来！」
首次为广东歌担任监制嘅王至尊，表示最欣赏JW嘅工作态度专业又认真：「每句歌词都令我感动不已，更加令我觉得我哋系『Power Couple』，正如歌词『各自成了 彼此至尊』一样！」
