张与辰 自从参加咗《中年好声音3》之后，佢嘅歌唱事业就不断发光发热，除咗拥有自己嘅歌曲、举行演唱会外，又担任其他歌手嘅音乐总监，尽展自己嘅音乐才华。过去一年多，与辰做出嚟嘅连串亮丽成绩，就获得家乡马来西亚嘅肯定，日前佢喺吉隆坡一个大马中文音乐颁奖礼上，获颁「海外杰出表现」奖，与辰拎到奖座嘅一刻，心情都百感交集。
马来西亚经已六年无举行华语歌曲颁奖典礼，与辰话今次有幸上台获奖，直言非常开心，除咗多谢大家对佢嘅支持，亦要感激自己20年来冇放弃追梦嘅理想，就系凭住坚持先可以得到奖项。与辰今次返到马来西亚，所到之处都有粉丝守候，此行咁啱喺与辰嘅生日月，一众粉丝当然把握机会同与辰庆祝生日。
