侧田 一连两场万圣节户外骚喺西九文化区举行，久未在港开骚令全场爆满反应热烈。今次侧田舍弃华丽舞台及打扮，反璞归真以沙滩、大自然为主题，营造自然感觉，又不时走近观众席同粉丝互动。
侧田先后演唱《Forget》及《运》，随即向现场观众大呼：「终于嚟到香港站！好挂住你哋呀！」随后一口气唱出多首代表作，包括《情歌》、《三十日》、《走音》及《男人KTV》，前奏一响起引发全场大合唱，场面震撼，同时触发侧田感性情绪爆喊：「冇谂过自己咁快会喊，真系好感动，我好挂住你哋㗎，四年啦，多谢你哋。」
回望入行20年嘅音乐路，侧田话自己曾经有唔同嘅道路，亦曾经迷失，但如今重新跟随音乐前行，唔再感到害怕。当侧田唱到快歌《VOLAR》及《爽》时，粉丝们high爆一起舞动，强劲节拍加上户外场地，令现场瞬间变身大型户外Disco，气氛炽热。
侧田近年旅居泰国生活，喺当地居住环境时常接触到森林及清晨景象，因此希望将呢种自由、舒服嘅感觉带到香港舞台，并分享自己朝早六点会喺骑楼做啲Birdcall、或者去悬崖、山崖到大嗌，然后啲雀仔、或者啲狗、鸡、啲动物出晒嚟，令佢深切感受大自然神奇感觉。
