王梓轩 作客 薛家燕 主持嘅电台节目，分享佢监制、执导、主演兼编剧同作曲嘅电影，有份参演嘅家燕姐话好开心见到今次部作品越嚟越多人欣赏，笑言自己已经好耐冇演歌舞剧，都想一展潜能，好多谢梓轩嘅努力，写咗好多歌去配合，整个团队拍摄得好开心。
梓轩仲诚意邀请曾志伟参演，家燕姐话志伟今次真系好帮手，施展影帝演技，虽然佢戏份唔多，但演得好好，电影参展志伟一定攞奖，第二个就系梓轩，佢喺戏中载歌载舞好精彩，更预告有场好感动嘅戏睇见都流泪。
家燕姐早前同梓轩出席釜山电影节，喺一个分享讲座上面，突然发生咗一件事吓到家燕姐同梓轩目定口呆，正当大家好严肃正经之际，有位现场总监因为认得家燕姐系经典电影《食神》中嘅味公主，非常祟拜，突然喺家燕姐面前下跪，家燕姐话好多韩国人睇咗呢电影，所以认得佢。
