伍富桥与妻儿搞笑造型庆祝万圣节 陈展鹏一家全员入戏充满仪式感

伍富桥 同太太 梁兆楹Shirley，上月宣布囝囝Julian出世，呢对新手父母，虽然忙住凑B，不过同时都不忘庆祝吓万圣节。Alvin就喺社交平台分享，佢哋一家三口扮鬼扮马嘅家庭照，相中所见Alvin束起孖辫，扮演电影《怪兽公司》里面嘅阿Boo，而太太Shirley就扮怪兽毛毛，而瞓紧觉觉猪嘅阿仔就扮大眼仔，呢个家族扮相认真搞笑。

Alvin仲写道：「Happy Halloween from Ng’s Family。呢个阿Boo造型要系要向2021年当时仲系单身嘅伍太致敬。」Alvin更大公开当年Shirley扮阿Boo嘅鬼马照，唔知系咪Alvin呢个举动激嬲咗伍太，为咗补镬佢只好公开埋自己当年扮鱿鱼游戏嘅假发造型照，真系够晒有趣呀。 

而同样全家上阵嘅 陈展鹏 一家三口，每年万圣节都仪式感十足，上年佢哋扮吸血僵尸，而今年佢哋又再全员入戏，展鹏今次就扮演手捧住南瓜嘅断头怪人，囡囡「小猪比」就同样营造出头被切下放喺盘上嘅造型，真系够晒惊吓，至于太太单文柔就化身红心皇后，散发住魔幻嘅气息。 

而相对之前两个家庭，汤怡一家就平淡少少喇，原来系因为老公 麦秋成 呢几日要喺中环美酒佳肴活动开工，所以汤怡同囡囡就以简单妆扮去探班，见麦QQ都有少少造型，仲准备咗糖果去现场玩Trick or treat，汤怡话麦QQ脸上嘅彩绘，其实系由佢亲自画上去，佢话囡囡仲嫌画得太少有啲唔开心添。