陈豪曾经喺剧集《夸世代》中大骚八块腹肌，但其实佢喺电影《晚9朝5》入面，更试过露股演出，在场嘅 龚嘉欣同 林秀怡 听到后即双眼放光，仲问主播 许文轩 有冇片可以即场播畀佢佢睇！
myTV SUPER重温《一周星星》精彩内容
讲返呢套阿Mo嘅处男作，佢就话自己喺戏中除咗露股外，人生做过嘅所有事都喺晒电影入面，令两位女士再次沸腾，仲话要返屋企揾片源嚟睇。虽然系佢人生首部电影，不过阿Mo就话太太 陈茵媺Aimee 未睇过，而嘉欣即话要揾嚟畀对方睇。
讲到当年点解会肯接拍呢部电影？阿Mo话因为自己系初哥，初哥就系咩都要做，但佢话呢部电影系自己从影以来最钟意嘅一部，幕前幕后都打成一片，拍得好开心。
不过问到而家有家室嘅阿Mo，仲会唔会接拍呢类戏？佢就讲笑话自己唔介意，只系对手会介意啫。之后佢再正经咁回应，觉得演员接拍得就要投入去演，好过遮遮掩掩令观众睇得唔舒服。
虽然播唔到阿Mo喺电影中嘅片段，但系节目中就揾返佢当年为香港小姐又唱又跳嘅演出出嚟，阿Mo一路睇一路话都唔记得自己曾经做过呢啲「佳作」呀！睇完片后阿Mo就话相当回味，仲话自己最钟意系跳舞，第二系唱歌，林秀怡听到即时提议佢今年台庆要跳返part舞嚟致敬当年嘅自己！
《一周星星》星期日晚 21:30 翡翠台