黄翠如 最近正式产后复出，第一炮就飞咗去马来西亚拍新剧，不过一去就要咁耐，最令佢挂心同最放唔低嘅，一定系佢嘅宝贝仔「萧哈哈」喇，所以呢次佢索性带埋「哈哈」一齐去当地开工，加上𠮶边有闺蜜兼「哈哈」嘅契妈 吴天瑜 照应，所以翠如都好放心带埋哈哈同行，除咗有闺蜜相伴之外，剧组亦都好贴心，喺片场打造专属BB房，等翠如可以边拍剧边享受凑仔乐，简直系职场妈妈最高境界。
另一边厢，要同老婆囝囝分隔两地嘅萧正楠，嚟紧因为要同马国明、曹永廉喺广州开演唱会，所以佢暂未有时间去大马探班。不过阿萧都有喺社交平台隔空抒发思念之情：「好挂住萧哈哈，佢去咗马来西亚陪妈妈，呢段时间训练得很好，已经有信心可以同哈哈去旅行，再努力工作多一阵子就可以了。」之后阿萧仲话翠如系旅游达人，期待佢哋一家三口一齐「眼睛想旅行」。最后求生欲好强嘅阿萧，仲写道：「PS更加挂住条鱼，漏咗呢句会好危险。」认真搞笑。
同翠如喺当地一齐拍剧嘅 黎诺懿 竟然抢先回应阿萧嘅帖文：「差不多啦，好快返﹗」，睇嚟诺懿𠮶句「好快返﹗」应该比到孤伶伶嘅阿萧唔少安慰喇。
而契妈吴天瑜亦有喺社交平台限时动态，分享翠如带哈哈一齐游水嘅片段，片中所见佢哋去咗当地一个好似水上乐园嘅游泳学校去玩水。翠如亦忙里偷闲，同哈哈一齐落水玩，唔怕水嘅哈哈乐在其中，同契哥一齐玩得不亦几乎啊﹗
