张家辉 同 钟雪滢 主演嘅电影《我阿爹想旅行》感动到唔少观众，就连自言甚少会流泪嘅 廖启智 细仔 廖文信 ，亦表示自己被电影剧情触动到，皆因佢话戏中充满既视感，无论系度血氧机嘅哔哔声、于病房过夜、揸车送返工等情节，都令佢好似再次经历当年父母留院嘅情景。
文信喺社交平台分享观后感，并指五年前佢嘅爸爸廖启智亦想去旅行：「读大学𠮶阵得知佢好钟意骑马，我中学又喺蒙古骑过马好开心，𠮶时就暗暗计划，等我毕业出嚟做嘢，储吓钱就请佢去蒙古骑马。点知一毕业就撞正疫情封关，佢又等唔切突然走先，呢件事成为我其中一个遗憾。」
文信指上年到妈妈 陈敏儿 想去旅行，佢指因为妈妈想睇星星，而自己喺中学时，曾经喺蒙古睇过好靓嘅银河，于是佢就决定带妈妈去蒙古旅行。文信指为免同一个遗憾发生两次，所以呢次佢哋「说干就干」！即使过程有啲波折仲争啲去唔到，但幸好最后都成功出发，文信喺帖文中写道：「一大片银河系眼前，都算系圆咗老母嘅心愿。我都有去骑马，算系代咗阿爹完成心愿啦～一年唔够，佢哋就团聚了。」
直言平日好少会分享心底话嘅文信，指《我阿爹想旅行》呢部电影令佢好有感受，佢最后附上2019年最后一次家庭旅行，父母喺澳洲大草原上嘅合照，并劝告大家：「唚气都想讲句，时间真系唔会等人，及时做应该做嘅嘢唔好拖。有啲嘢真系预计唔到，尽量唔好令自己后悔啦🤍bye! 」
