台庆剧《玫瑰战争》即将播出，一众演员 杨茜尧 陈豪 陈展鹏 傅嘉莉 姚子羚等演员现身商场宣传，吸引大批粉丝到场支持。
剧情揭露娱乐圈嘅秘辛同黑暗面，陈豪饰演嘅娱乐公司老板同茜尧饰演嘅影后，幕前幕后都有一番角力，茜尧话剧集结合友情、兄弟情、爱情、出轨、出卖、复仇同背叛嘅剧情，仲话佢喺剧中因为忍无可忍，而誓要将真相揭开。
当主播王镇泉问到佢：「系咪Dry住去复仇？」「有无少少滋润？」身旁嘅阿Mo笑到人仰马翻，仲话「唔可以湿住去复仇咩？」阿Mo嘅幽默回应引起全场哄堂大笑。 阿Mo呢位大老板，旗下靓女无数，要掌控呢班难搞嘅女明星，都好考验阿Mo嘅功力，阿Mo更以玫瑰嘅刺嚟形容班女明星有几棘手呀。
展鹏今次同Kelly饰演一对，不过呢两公婆就唔系行sweet路线，剧中两人貎合神离，关系麻麻，但Kelly话现实同展鹏合作时，就感受到拍档真系好靓仔，展鹏话近呢十年，好多人话佢真人靓过上镜，原因系过往大部分时间佢都系演草根角色，唔需要著华衣美服，但原来著起靓衫，又真系可以carry到，比到观众另一种感觉。
剧集改编自 吴沚默 几年前出版嘅小说，揭露明星私底下不为人知嘅一面，佢话当初谂如果公司肯拍嘅话，女演员们就可以多啲job。有份参演嘅 邝洁楹 ，剧中角色系童星出身，形象清纯，Judy讲笑话自己本色出演，所以难度唔算大。
