黄夏蕙 同 邵音音 于万圣节出席活动，两位为应节，化身九天玄女同半人半魔鬼向途人派糖。夏蕙姨早前因为白内障而开刀接受手术，令大家相当担心佢嘅健康，不过夏蕙姨就叫大家唔使担心，表示做完手术后白内障同老花都冇晒，仲话而家自己叻到连对方有几多条白头发都睇到。
夏蕙姨话自己做完手术当晚，已经包住纱布出骚，音音姐就指夏蕙姨完成手术后，觉得呢个世界好美丽，更加珍惜，又会继续多接骚登台呀。
早前夏蕙姨就开生日会庆祝大寿，佢就话好开心可以见返晒啲老友，就连平时好少出门嘅黄天丽都有到场，而夏蕙姨嘅囡囡亦专程喺美国返港同佢庆祝。问到音音姐会唔会考虑下年都搞返个生日派对？佢就搞笑咁话自己虽然好钟意热闹又好想搞返个party，但就担心到时一围人都请唔到㖞。
另外，夏蕙姨早前接受节目访问，当中细诉高调追讨亡夫胡百全逾三千万遗产嘅细节，佢指相隔多年先追讨，系因为当年生活费被暂停，自己又冇钱，又申请唔到法援，所以等到而家可以请到私人律师先嚟追讨。夏蕙姨指自己追讨嘅全部都系由胡百全当年亲自签署及承诺嘅生活费，至于被问到会否担心被正室子女反对？夏蕙姨就指正室个仔同大女都已经离世，所以唔担心，佢又指若成功追讨后，会将呢三千万全数捐入慈善基金，用嚟兴建护老院及做长者服务。
