胡枫 呢日大病后首次现身公开场合，获一个颁奖典礼颁发「世界杰出华人终身成就奖」，表扬佢数十年来对演艺行业嘅贡献，一向幽默嘅修哥呢日仲指自己的确威水，仲非常开心又荣幸，更重申自己永不言休呀。
修哥早前因身体问题曾一度昏迷留医，消息令外界大为担忧，呢日佢就指得上天眷顾，精神亦日渐康复，不过就略为减少同朋友间聚会喇。至于「契仔」 张家辉 早前宣布明年新年将展开红馆演唱会，呢日修哥就指到时将直接现身现场，仲严词话收唔到邀请连呢个契仔都唔要呀。
而 成龙 同 谭咏麟 呢日亦合体现身，为多年好友 曾志伟 送上「世界杰出华人奖」，更合唱《朋友》介绍老友上台。而志伟本人就指，两位好友系自己榜样，因为多年来两人为大众带来无穷娱乐同欢笑，仲指自己于两人面前成就小巫见大巫，自己非常荣幸。
来年系TVB成立60周年，志伟指刚好系香港回归30周年，所以相信明年TVB节目同剧集将非常丰富，仲提到希望有机会为大家再一次带来《奖门人》节目。而一代「奖老」 钱嘉乐 闻言亦非常高兴，仲回忆多年合作片段。
影帝 梁家辉 呢日同样系得奖人，仲一直同修哥倾唔停口，而提到过往最深刻作品，家辉就话希望可以多到大家数唔晒，仲话演艺界上下齐心，更加指要向修哥学习，一样永不言休继续努力呀。
颁奖礼后大会晚宴，就有多位圈中朋友现身祝贺，而《中声4》几位三甲唱将亦都现身娱宾。