邓丽欣 近日获 香港驻三藩市经济贸易办事处 邀请，飞往美国出席「夏威夷国际电影节」，Stephy以佢主演嘅代表作《金都》同即将上映嘅新片《大分瓶》亮相，出席电影放映、香港之夜同专场座谈会，与当地影迷见面。两场电影放映会反应热烈，夏威夷影迷热情非常，Stephy之后同佢哋逐一合照签名，当晚现场观众更成为全球首批抢先欣赏到由Stephy亲自填词并主唱嘅《大分瓶》主题曲《无二分》。
Stephy坦言首播时心情紧张，幸观众反应热烈，令佢大为感动：「真系好开心，喺电影节播放《金都》，虽然系好多年前嘅作品，但今次都有一个spotlight可以介绍畀大家，最搞笑嘅系有观众观赏完电影《金都》后以为我嘅新歌《已经离我太远》MV，系电影中角色阿芳20年后嘅续集，我都有解释唔系，哈哈……两套电影放映后大家好都热情，最惊喜嘅系好多移居当地嘅香港人都嚟支持，原来佢哋都好留意，知我啱啱出咗碟，佢哋同我讲希望有多啲香港电影喺夏威夷上映，希望可以继续带多啲香港电影去唔同嘅电影节，大家继续支持香港电影！」
今次系Stephy首次到访夏威夷，可惜因为行程紧密，未有时间享受阳光海滩，不过依然感受到当地人嘅热情，佢更直言有机会一定会再到访：「今次系5日4夜嘅行程，本身以为天气唔系几好，第一日到埗仲有少少雨。但系第二日就非常之好天，好靓嘅蓝天白云，真系感受到夏威夷嘅靓，虽然每日都有行程，冇乜点样出去玩同感受吓大自然，但都有争取咗少少时间去行吓街，去沙滩望吓，所以都开心嘅。」
「座谈会后有朋友问我会唔会去夏威夷开演唱会，我𠮶刻都有谂，今次对夏威夷嘅感觉真系好好，但冇咩时间去玩，如果真系有机会开骚就可以顺便去游览，都几开心！希望有朝一日参与当地嘅音乐活动。」
