张文慈 自从2021北上发展直播带货之后，就先后喺上海、广州、深圳等地居住，但自从去年底，Pinky嘅继母不幸离世后，佢就决定更经常返港陪伴已年届80岁嘅爸爸，并喺早前购入启德一个400多呎嘅两房海景单位同爸爸一齐住。
Pinky亦喺社交平台同大家公开寓所Room Tour，身穿睡衣素颜上阵嘅Pinky表示，爸爸近年身体唔太好，经常受痛风同高血压困扰，所以佢一直有请家佣照顾爸爸，由于居住地方有限，佢就将大房留比爸爸，自己就同家佣瞓一间房，姐姐瞓上格床，而自己就瞓下格。
Pinky话自己过往多年都有自己独立房间，所以而家要同家佣姐姐同房share都要适应吓，佢仲讲笑话夜晚除咗唔可以嘈之外，连姐姐放个屁佢自己都闻到㖞。虽然有啲唔习惯，但Pinky话佢唔介意，最重要系可以陪到爸爸，即使要港粤两边走，都话值得。
Pinky仲话而家开始习惯留港生活，仲觉得自己越嚟越能干，能屈能伸，咩事都搞得掂。而效力TVB一段时间嘅Pinky，亦获公司邀请出席颁奖礼，接受「10年长期服务奖」嘅荣誉。
