热播剧《璀璨之城》进入结局周，官家两兄弟继续出招斗法，虽然未知边个最终可以成功掌控集团，不过饰演官孝君嘅 吴卓羲Ron 就暂时放低权力游戏，为自己下月举行嘅《与你同行音乐会》东莞站宣传。
myTV SUPER重温《璀璨之城》豪门家族争产
Ron拍片为下月12号举行嘅音乐会宣传，为咗食举行地点「东莞」嘅音，所以佢喺片中就以「Don’t go 走咗惊你后悔，Don’t forget 12月有大动作，Don’t 管 嚟咗先讲。」作为开头，表示自己12月12号将喺东莞开骚。不过唔少网民睇完片，就留言打趣Ron，话佢系咪因为最近跟得 Kelly张曦雯 多，所以英文都进步咗；亦有唔少网民留言问到时 Kelly 会唔会到场。
其实今年6月时，Ron已经喺珠海举行过音乐会，当时仲邀请到 任贤齐 做嘉宾，所以今次东莞站亦有唔少人猜测Ron会邀请边个担任嘉宾，除咗绯闻女友Kelly外，亦有唔少人提议佢揾已经甚少喺幕前现身嘅 徐子珊Kate 嚟做嘉宾呀。