阮嘉敏 Mandy 凭恋爱真人骚《女神配对计划2》人气急升，唔少观众睇好对佢同求爱勇者 吴旭东 之外，亦好欣赏Mandy嘅性格同谈吐，认为佢非常大方得体以及拥有高情商，加上Mandy钟意玩社交媒体，不时就会同网民互动，展现贴地一面，因此收获大量人气。
Mandy喺生活中亦系一位爱宠之人，非常爱锡饲养嘅哥基犬ShuShu，早前佢为爱犬举行简单而隆重嘅生日会！Mandy更鬼马用爱犬口吻撰文，分享ShuShu嘅庆生心情：「生日系咩嚟㗎？冇所谓啦有蛋糕食就得，我会继续食好住好身体好。妈妈你继续畀心机揾钱跑山，我会继续做返我本分努力叹世界！」
而从Mandy分享嘅连串照片可见，佢为ShuShu嘅生日特别花心思，除咗准备狗狗可食用嘅生日蛋糕，又喺蛋糕插上印有ShuShu照片以及写有「Happy Birthday」嘅旗仔，仲好有仪式感为爱犬戴上生日帽。
揽住ShuShu合照嘅Mandy亦笑得非常灿烂，净系睇相都已经感受到一人一狗之间嘅嘅温馨。唔少网民都祝ShuShu生日快乐，东东都有留言，表示：「可爱滴ShuShu生日快乐呦。」
