早前 JW王灏儿 被爆同足球队班主 王至尊，喺去年11月已经喺土耳其秘婚，呢日JW带住幸福肥，出席一个电台颁奖礼记招时，亲证去年已经成为王太，即场收获多位好友祝福，JW话喺合适时机选择结婚，婚礼只邀请咗啲亲密好友参加，所有觉得需要在场嘅朋友都有出现，只系 朱敏瀚 同 周嘉洛 因为拍剧而嚟唔到。JW仲话本来同老公都想低调婚事，但后来被揭露消息，于是就制作咗首新歌顺带公布喜讯。
而呢首歌更记录咗JW同老公嘅爱情故事，甜蜜爆灯，嚟紧11月22号就系两人结婚一周年纪念，大家都期待佢哋再有喜讯，JW坦言对造人计划顺其自然，唔会唔想，不过下年有音乐大计要实行，自己都好期待。
JW幸福满泻，相反最近回复单身嘅 陈康堤 ，呢日喺活动上，明显笑容减少。康堤同网球一哥 黄泽林 恋情告终后，男方被爆火速挞着 谭旻萱 Mandy ，更有指二人交往嘅时间同康堤似有重叠，故引起外界揣测，更有指 陈奕迅 同 徐濠萦 为爱女集体取消关注黄泽林社交帐号，以行动表态支持囡囡，唔知系咪怕越描越黑，所以康堤就表明唔接受传媒访问。
呢日出席活动嘅仲有 陈晓东、冯允谦、李幸倪、泳儿、张驰豪、林智乐、冯熙燮、颖乔、冯允谦、陈家乐、曾比特、洪嘉豪、张天赋、魏浚笙、周殷廷、马天佑等等。家乐成为今年角逐男新人奖最大年纪一位，佢唔单止冇觉得尴尬，仲话出到歌已经好开心，去颁奖礼则随缘，但希望喺音乐方面越做越好。
呢日天气最高有28度，场地阳光普照，见到Ryan重叠层次嘅衣著以及颖乔披住毛毛嘅装束，真系望到都觉得有股热气，直头好似自带暖炉一样呀﹗
