吕慧仪 、 张景淳 呢对「龚水」CP日前再度合体，联同 刘展霆 一齐为《好嘢港多啲》进行拍摄，呢次都系「龚水」喺《爱・回家之开心速递》结局后再同框。三位喺节目中会同大家介绍香港嘅供水系统，所以「龚水」绝对系玩住食字合体。
阿蟹都好开心好感恩剧集完结后，大家依然记住佢哋呢对CP，出到街都会听到观众话好挂住剧中角色，而且呢次跳出11厂同大家见面，有种更亲近大家嘅感觉。景淳就话虽然同阿蟹冇见几个月，但估唔到再见返默契依然不变，代表过去十年冇白费。而刘展霆都好开心可以再同「龚水」合作，仲话好似见返师父一样。
阿蟹主演嘅舞台剧近日喺深圳圆满落幕，呢次亦系佢第一次演舞台剧，感觉新鲜得嚟都颇有压力。事关呢次阿蟹要用普通话演完全剧，真系极具挑战性。不过完结呢个演出后，阿蟹都话钟意上演舞台剧，而且佢哋四个女主角好有缘份，连星座都系两个处女座、两个天蝎座，但生肖全部都系属狗，令佢觉得好有缘份。
阿蟹工作虽然忙录，不过佢都好注重亲子时光，最近更见证囝囝蟹籽喺游水比赛夺得两个金牌嘅殊荣。阿蟹就话，蟹籽今年12岁系最后一年可以参加赛事，所以佢就帮阿仔报名平时好少报嘅项目，而咁啱𠮶啲项目好少人参加。阿蟹更向囝囝灌输良好竞赛心态，叫佢要同以前嘅个人成绩比较，唔好以为人少就可以慢慢游。
至于庆祝方式，阿蟹就话囝囝好容易满足，喺屋企打机同食薯条已经好开心。
