台庆剧《玫瑰战争》将于11月9号推出，一众主演呢日以华丽装扮现身，配合剧中角色拍摄宣传片及海报，率先披露佢哋喺剧中人物角色。
杨茜尧 以一身高贵冷艳Look攞住奖座现身片段中，今次佢会饰演复仇者角色 夏无双，唔只系恶女复仇咁简单，会描述佢喺娱乐圈经历，夹杂爱情、友情、妒忌同出卖多种情感，加上主题系讲娱乐圈，同自身职业一样，对茜尧嚟讲系一个几新尝试。今次剧中有好几位对手都系茜尧首度合作，而之前佢同林夏薇喺《黑色月光》中嘅角色都系讲复仇，所以今次佢要更落力摆脱前身影子，带俾观众耳目一新感觉。
马国明 会同 陈豪 嚟个双视帝合作斗演技，虽然大家都系视帝级人马，但马明就激赞阿Mo演戏时好有张力，令两人碰撞出强烈火花，直头系嘭嘭声一种前所未有嘅感觉。
陈自瑶 喺剧中同未合作过嘅对手碰头感新鲜又开心，而令Yoyo觉得最幸福嘅就系有幸同阿Mo及马明佢哋合作，因为入行以嚟同两位虽然有同剧，但就冇演过对手戏，今次终于如愿以偿，可以乘机向两大视帝偷师，并多谢监制给予机会，令佢可以同重份量级对手合作。
为咗突显 陈展鹏 饰演嘅富家公子角色，拍摄时煎Pan可以著到大量靓衫，尝尽少爷仔生活，同过往出演嘅角色发挥大不同，喺剧中会有好多女友，出生背景亦赢在起跑线，受过高等教育，好识睇人眉头眼额，会见高拜见低踩。
饰演豪门新抱嘅 傅嘉莉 能够同偶像杨茜尧合作固然开心，但喺剧中佢都有沉重嘅一面要挑战，角色立体得嚟又好复杂，横跨2018年时至2025年嘅经过同成长。而 姚子羚 一身中性打扮，喺剧中会夹着经理人兼艺人身份，仲会有段好精彩嘅感情线。
《玫瑰战争》11月9日起 20:30 翡翠台
