台湾演员 范少勋 许恩怡 及 林熙彤 呢日现身公司结盟仪式，大会仲为11月4号生日嘅范少勋送上蛋糕补祝生日，令佢非常开心。
两间公司结盟都代表未来多咗嚟香港工作嘅机会，少勋都喺访问时讲咗几句广东话介绍自己，佢仲话唔抗拒用全广东话拍电影，因为点样用唔同语言去诠释作品，系演员会好想挑战嘅事，亦会期待观众埋唔埋单。
少勋呢次嚟香港有机会同 古天乐 见面更得到对方鼓励，佢都有把握机会推荐自己，因为自己好钟意动作片，觉得好热血刺激，亦希望将呢份刺激带俾观众。
香港网球一哥黄泽林官宣同新欢谭旻萱嘅恋情后，被怀疑有无缝接轨之嫌，唔少人都戥旧爱康堤唔抵。同Mandy同公司嘅Hazel、Natalie都对事情选择避谈。面对追问Hazel就话，佢哋好少机会见面，大家都各有各忙，冇时间交流，而每段关系都有需要学习嘅嘢，所以作为外人都冇必要作评论。
讲到未来最想挑战嘅电影类型，三位都话系鬼片。Natalie希望尝试唔同类型嘅角色同片种，尤其台湾流行鬼片，所以佢都希望有缘拍到，可以饰演被吓嘅角色，而Hazel同少勋就反而想做鬼。少勋解释，因为自己被吓到好容易发噩梦，但吓人应该唔会，而佢亦都好接受化特技妆拍戏。
