粤剧殿堂级名伶；人称「美艳亲王」嘅卿姐 罗艳卿 日前举行「期颐宴」，筵开20席庆祝百岁大寿，大批圈中好友亲临祝贺，包括有同卿姐同为八牡丹之一嘅好姐妹南红、修哥胡枫、薛家燕、冯素波等，大家唱生日歌为卿姐送祝福，场面热闹又温馨。
卿姐著住侄孙 谢建业 为佢全新订造嘅大红色刺绣礼服，睇落喜气洋洋，「美艳亲王」嘅风采完全不减当年。卿姐开心接受众人嘅祝福同贺礼，佢话好多谢侄孙为佢筹备今次嘅寿宴，虽然自己冇儿冇女，但侄孙嘅孝心胜过亲生仔。
卿姐仲话自己成日都会打麻雀，不过又自嘲「又聋又盲、走鸡多过食糊」。而南红就赞卿姐人缘好朋友多，昔日八牡丹得返佢地两位，而最紧要就系大家继续身体健康。
卿姐百岁大寿，好拍档修哥送上大大拥抱兼献吻，卿姐话自己同修哥称兄道弟，之前修哥开红馆骚，卿姐唔止去撑场，仲坐足四个几钟。至于细细个就跟住卿姐拍戏嘅家燕姐，就话自己原本有其他工作安排，但就特登推晒所有工作，一定要亲自来为卿姐贺寿。
