圈中唔少艺人系匹克球（Pickleball）爱好者，关楚耀、陈庭欣、黄子恒同伍富桥等呢日参与慈善赛，各人换上运动服，打起上嚟真系有板有眼，黄子恒前一晚出席台庆剧《璀璨之城》于澳门盛大举行嘅「结局夜」，佢只系瞓咗几个钟，就参加呢个慈善球赛。
讲到剧中演员张智霖、高海宁睇到喊晒，黄子恒都觉得好感动，佢话本身冇睇过𠮶场戏，行近张智霖时，有向竖起大拇指畀个叻，黄子恒话自己啲情绪都涌上嚟，完全感受到张智霖角色嘅心态同难处，虽然张智霖嘅角色系一个坏人，作为剧集最重要系被角色嘅故事所触动，黄子恒亦希望《璀璨之城》喺颁奖礼获得最佳剧集，男女主角奖项都拎晒。
同场嘅伍富桥亦好唔够瞓，近排忙于照顾刚出生嘅儿子，通咗三晚顶享受甜蜜嘅负担，伍富桥话严重睡眠不足，但佢都用好多时间陪住阿仔，有感呢个时间系好珍贵，伍富桥话呢日要教班同比赛，前一晚就喺阿仔嘅喊声当中，提早瞓着咗。伍富桥亦有上网睇啲育儿方法，亲身试咗系OK，话BB喺扭食奶又未够钟𠮶阵，伍富桥施展止哭神技，令阿仔马上停止哭泣，仲话觉得阿仔好需要佢添！
