恋爱真人骚《女神配对计划2》喺上星期日（8号）播出嘅水上乐园篇，除咗淘汰Tony同Mark两位求爱勇者之外，中途加入嘅女神 梁超怡 亦成为被节目淘汰嘅首个女神，令一众女神同求爱勇者都感到相当惊讶。
虽然超怡嘅呢段配对旅程旋风式完结，不过佢都好开心透过节目认识一班新朋友，同时睇见每个人嘅独特亮点，更喺社交平台分享多张花絮照以及出长文分享心声，佢话：「关于当初嘅选择，我冇后悔过。」仲话既然决定加入，总要俾个机会自己同心中想拣嘅人认真相处。
其实超怡同属另一位「中途加入」嘅女神 陈星妤 自喺节目亮相后，一直备受观众关注，有睇好亦有批评，认为两位嘅加入非常突然。
而超怡对唔同嘅声音亦抱持开放接受态度，佢喺文中写道：「「中途加入」呢个身份，系过程中难免有唔同嘅声音，但我好清楚嘅系：无论点样做，唔同嘅声音都一定会存在；所以我选择听从直觉，亲身去相处、去感受，无愧于心就够。至于会唔会觉得可惜？缘份呢样嘢，去到边度就边度，顺其自然就好，真系冇咩好可惜嘅。」
虽然超怡呢次未喺节目中成功配对，揾到心仪可以发展嘅男士，不过佢都充满正能量，认为「我相信只要时间对了，有缘嘅人总会走到一起。」仲为每位女神同求爱勇者送上祝福，祝大家都可以揾到属于自己嘅幸福 。
《女神配对计划2》星期日晚 20:30 翡翠台