「金牌司仪」 林盛斌 同老婆 黄乙颐 结婚多年，感情一直恩爱如初，佢亦系一位积极赚钱养家嘅好爸爸，外界更传阿Bob嘅身家已经有十亿，完全系一位「隐形富豪」。
11月9号系Bob嫂嘅46岁生日，阿Bob当然有好好为老婆庆祝，不过两位并唔系叹高级奢华浪漫烛光晚餐，而系享受「贴地的浪漫」，一齐食炸鸡脾、炸大肠配埋煎酿三宝呢啲地道小食。阿Bob贴出二人「原图直出」合照，仲好识赞老婆：「冇P图，冇美白，冇滤镜，46岁嚟讲，佢都保养得唔错㗎啦。」放闪放得非常有爱。
不过阿Bob当然唔系两手空空咩礼物都冇准备，只系留低线索「新款」「可以折」，又卖关子话要等老婆「自己讲」。Bob嫂随后喺网上晒出一部新款折机，感谢大家向佢送上生日祝福之余，仲话自己冇打算公开自己岁数，点知老公快过自己出Post。
阿Bob除咗家庭美满，佢日前喺社交平台开心宣布，由佢首次担正同 罗子溢 合作嘅剧集《警是个大佬》，即将喺12月14号晚八点半喺翡翠台播出，希望大家有时间嘅话，都可以可以睇一睇。
