52岁刘恺威与32岁黎纪君（Christy）相恋，二人公开认爱后打得火热，网上甜蜜足迹不断，不时打波晒幸福。呢日爸爸刘丹出席活动，讲起阿仔新恋情时，丹爷话见阿仔拍拖开心，自己都好开心。
丹爷同太太李馥莹对Christy好满意，话阿仔有带Christy见家长，之不过大家见面时间短，未系好了解，丹爷话估孙女刘苡馨（小糯米）应该知情，身边嘅马海伦赞恺威好识做，相信恺威会处理好，又大赞小糯米系开心果，好叻又转数快，丹爷闻言则在旁哈哈大笑。
《爱‧回家之开心速递》落幕后，丹爷休息咗一段时间，顺利完成膝关节嘅小手术，恢复良好，丹爷亦精神奕奕话做完手术第三日已落地行，一开始扶住行，一个星期左右已可以拎拐杖行。好友马海伦一直知丹爷有膝盖旧患，但唔影响当时《开心速递》拍嘢，丹爷话目前仍要继续操练。
78岁马海伦获网民赞唔似真实岁数，马海伦话年尾迎嚟79岁，自己喺疫情𠮶阵冇机会打golf，马海伦就走去行山，后来听发哥周润发话缓步跑系好，马海伦就跟住练，而家最多系跑10K，觉得做到10K已经好好！
