返嚟喇返嚟喇！男臣归位喇！当年《超时空男臣》播出时，引起唔少热话，观众们更加系准时追剧睇下三位男臣喺现代又闹出咩笑话。相隔九年，几位男臣终于再次归位拍摄《超时空男臣II》，之前喺铜锣湾闹市拍宣传片时，已经引嚟唔少途人围观拍片。
今次三位男臣身负重任，要揾返太子同公主，而喺预告片片尾，似乎仲有位big boss等紧佢哋！虽然暂时仲未知今次 萧正楠 曹永廉 同 何广沛 三兄弟，又会经历啲咩爆笑而惊险嘅经历，不过马国明日前同阿萧、阿廉出席节目巡礼时，就话因为自己冇份拍而相当失落！阿萧话而家佢哋考虑紧十年后拍第三辑，仲话到时等阿廉唔喺度，马明就可以顶对方个位，搞到阿廉不断要吐口水话大吉利是。
阿萧又赞之后加入访问嘅三弟何广沛，话对方因为要就自己嘅schedule而搞到要天地更，仲叫因为唔够瞓而呆呆嘅三弟，瞓入佢怀抱休息下！