方力申 挑战港澳慈善渡海泳嘅日子进入倒数，虽然日日忙练水，不过有慈善活动，小方依然好积极参与。呢日一个跑楼梯比赛，连续第三年担任活动大使嘅小方亦有现身支持，讲起渡海泳，小方话已经准备得七七八八，不过近日左边膊头有啲痛，所以要减少练水。
即使操水再忙都好，小方仍然心系囡囡Isla方爱嘉，尽量抽时间陪囡囡，佢话11个月大嘅囡囡已经识得分爹哋妈咪，对父母嘅爱又好公平，每朝行去锡完妈咪，就会再行埋佢度锡返啖，非常窝心。
跑楼梯大赛吸引唔少艺人报名，好似许惠菁、刘浩龙就组队参赛，四位中声唱将颜米羔、李金凯、陈旭培同梁浩贤亦有组队，现场仲有唔少粉丝帮佢哋打气，四位唱将亦冇令大家失望，均以佳绩完成，首先冲线嘅米羔笑言自己喺屋邨长大，自细就不时行楼梯。
