胡杏儿同冯德伦合作新戏《第四幕》，杏儿接受《电影泉攻略》访问，分享拍摄点滴，佢话印象最深刻系一场掌掴Stephen嘅戏，因为用力过猛，连自己都吓亲，好彩Stephen完全唔介意，反过嚟安慰佢。
杏儿话自己现阶段对角色嘅认识同初入行有好大分别，因为年纪大咗，更容易将自己嘅人生经历投射入角色当中，好似依家做妈咪嘅角色，直头可以话系手到拿来。
杏儿依家除咗做幕前工作，佢亦重拾学生身分，喺香港演艺学院修读幕后制作课程，佢话同学初初见到佢都觉得好惊讶，不过真正相处之后大家都好融洽，佢仲自嘲系全班最老学生。而佢依家最大嘅顾虑系全世界都知道佢读紧书，如果冇办法顺利毕业，就会好冇面。
今个星期嘅新片速递有
《第四幕》：过气导演欧文为挽回尊严，决定自编自导自演新作。欧文渐渐迷失於戏剧同现实之间。面对老板紧逼、旧拍档强行介入，加上婚姻危机，欧文嘅情绪走向疯狂。尽管他排除万难要素人汉娜担正主演，但就喺首演夜，迎嚟咗一场无法挽回嘅失控残局。
《打劫银行是咁的》：YouTuber拍片教人「完美打劫银行」，不为钱财，只求「劫富济贫」？警方捉佢唔到，银行奈佢唔何，誓要将这群「慈善」劫匪捉拿归案。究竟呢场猫捉老鼠游戏，边个先系最终赢家？
《衰鬼圣诞颂》：今个11月，怪诞男神Johnny Depp再创癫疯，变身「孤寒财主」史高治。熟悉名字，变出破格故事。暗黑奇幻鬼才导演泰韦斯惊喜操刀，联同一众荷里活红星，同你抢先迎圣诞。
今个星期嘅票房龙虎榜，截至11月11日中午为止，第一位《哥斯拉-0.0》、第二位《我阿爹想旅行》、第三位《善男信女》。
