吴家乐于2006年迎娶其士集团创办人周亦卿千金周蕙蕙，由于周氏家族资产估计高达数十亿元，女方家族财力雄厚，吴家乐被外界冠上「50亿驸马」称号。吴家乐早前接受梁靖琪（Toby）网上节目访问，以极高EQ自嘲姓氏变长，大爆豪门千金老婆非常悭家，令昔日大花筒嘅吴家乐彻底改变价值观。
吴家乐与爱妻周蕙蕙结婚至今廿年，育有一女及一对孖生仔。周蕙蕙出身豪门并继承家族生意，但其作风低调朴素，平日唔爱用名牌，与吴家乐钟意去茶餐厅同车仔面店。对于早年「黐金糠」嘅闲言闲语，呢个伴随廿年嘅标签，吴家乐笑指早已习惯，更自嘲而家唔系姓「吴」，而系「五十亿驸马吴家乐」，因为次次新闻报道都系咁去形容。
吴家乐面对网民与外界批评，佢毫不在乎，内心最介意系太太、外家同屋企人点睇，觉得其他人讲嘢唔使理，吴家乐用20年光阴证明真心，更透露太太周蕙蕙讲过「唉，你要假都唔会假20年、30年啦，我同你结咗婚都20年啦」，成为二人婚姻最踏实嘅证明，吴家乐亦坦言而家自己所拥有嘅嘢，喺婚前其实早已拥有。
吴家乐忆述单身寡仔𠮶阵贪靓又挥霍，招积到揸跑车返工，年年换车，贪靓又钟意买衫，「揾6000就买8000𠮶啲人」，后嚟呢位「大花筒」认识太太周蕙蕙后，吴家乐爆太太生活悭家贴地，吴家乐价值观被彻底颠覆，明白到「需要」同「想要」嘅嘢系唔同，体会到「曾经拥有过就算」。吴家乐以前钟意揸车，而家会觉得泊车太贵，自己会搭唔同嘅交通工具。
吴家乐坦言一段长达廿年嘅婚姻得来不易，彼此相处要不断磨合，二人恩爱婚姻秘诀在于为家庭学识忍让。吴家乐自认脾气火爆暴躁，但佢知道呢个性格系有代价，「有啲说话系唔讲得」，无论点都会喺小朋友𠮶度谂，唔可以咁冲动，从而学懂退一步同讲「对唔住」， 放下无谓嘅自尊，两公婆互相包容。
