为咗迎接11月19号《万千星辉贺台庆2026》，TVB逾80位艺员把握千载难逢机会，前所未有踏足12月先开启嘅中九龙绕道九龙湾段，仲动用近20架豪华房车作背景，捕捉香车配美人嘅画面，大堆头跳舞拍摄台庆序幕，气势如虹。一众艺人事前都频频热身做足准备，连TVBuddy都喺现场助阵一齐舞动。
企喺头排嘅有视帝 张振朗、 刘颖旋 仲有 朱敏瀚 等，佢哋好明显要肩负领军嘅重任，Tiffany对于企C位多少有啲压力，相反振朗同朱仔就笑指都系睇住Tiff跳舞，轻松跟队，冇担心跳错影响到后面，因为自己当下睇唔到，三人都会尽力跟上。
另一个焦点就落喺 陈晓华 同 朱敏瀚 分手后同框嘅画面，两人虽然相隔几个身位，但就冇咩交流，各自精彩。而呢晚Hera就要同 罗天宇 共舞，重现《帼国枭雄4》天宇抱起Hera一幕。Hera爆之前拍摄时，天宇抱起佢后气来气喘，天宇如今再度抱起Hera完全冇呢种感觉，因为对方瘦到好似纸咁薄，Hera乘机赞自己减磅成功。不过喺隧道跳舞令天宇有另一种难度，因为路上有暗斜，担心抱起Hera时会侧重一边，令佢全程都紧张到一额汗。
在场见大家都好享受喺新隧道跳舞， 蔡洁 就怀住另一种紧张嘅心情，因为佢自从2013年选美时公开跳过舞后，相隔十几年再度为公司活动献舞技，希望唔好失礼，而好友 刘佩玥 就好期待呢个画面。
仲有 周嘉洛、 吴伟豪 同 林凯恩 呢个爱回家嘅组合，三人一合体同以前一样咁好动贪玩，即场嚟个Free style嘅舞步，三人都对自己嘅舞姿有信心。
钟柔美 呢日就抱病上阵，但都冇影响佢活跃嘅一面，未埋位前仲同 詹天文 一齐落力排舞似模似样，两人好开心置身呢个可一不再嘅环境，仿如演出音乐剧一样。
另外，好多艺员近日都倾力为台庆表演项目彩排，同时忙于揾战衣，不过一向身材出众嘅波波 黄婧灵 就未有著落，因为连日都喺公司排舞至深夜，但届时一定会以华丽嘅装扮亮相。
