九龙塘广播道电台门口一向系追星族圣地，呢日一众歌迷就系等乐坛天王刘德华，偶像华仔8年后再踏足广播道宣传，一众粉丝非常热情，华仔见到咁多熟悉嘅面孔 ，心情劲兴奋，仲勾起好多青春回忆。
华仔话以前望出去见到好多灯牌，而家就见到好多电话，华仔心情好开心，感觉真系年轻过。华仔仲对呢个地方仍然好熟悉，笑指瞇埋眼都揾到洗手间。
华仔今次嚟宣传新专辑，呢次除咗推出录音室版本之外，仲联同合唱团及管弦乐乐手进行现场录音版，呢次新歌内容围绕最爱嘅家人同生活，华仔话录现场版只有四次机会，唱头三次都决堤落泪，只好唱到最尾𠮶段瞇埋眼唱，怕见到其他人喊，自己又忍唔住，华仔笑言考虑要唔要畀大家听吓佢唱到乱七八糟𠮶个样。
华仔年底举行跨年演唱会，透露好快要闭关准备，嚟紧乐坛颁奖礼就见唔到华仔身影，华仔对乐坛颁奖礼亦有感而发，好想凝聚广东歌歌手力量，话而家所有颁奖礼都好独立，出席歌手可能唔一样，有机会分散咗歌手影响力。
华仔记得当年四台联颁𠮶时，自己都有份表演，佢都想呢啲现象出现番，华仔亦好想搞一啲广东歌歌手活动，凝聚成个乐坛。问到华仔系咪搞个颁奖礼，华仔笑称系「华奖」，仲话第一届华奖，自己起码有一个传媒大奖啦。
