StarTalk一气呵成版|杜如风封世界级港女成爱情死因 首尔寻偶像GD足迹被反拍

杜如风 主持嘅全新旅游节目《跟风旅行团》将于16号喺翡翠台首播,今次杜如风会带观众到首尔吃喝玩乐,并直认公器私用跟住偶像G-DRAGON嘅足迹。另一个重点系佢打扮成GD其中一个造型到GD寓所外拍摄,殊不知就被GD本尊反拍,虽然好开心,但也有失落:「最惨我睇佢唔到,但佢睇到我,不过都光宗耀祖啦﹗」


众所周知杜如风嘅偶像系梁朝伟,而家高调钟意GD,杜如风话自己并冇变心,如果二选一,佢都会拣梁朝伟呢位超级偶像。

对于韩国两字,杜如风回想十年前拍摄节目后被封「世界级港女」,笑言12年来冇拖拍都系因为呢个「名号」成为死因,讲到又物质主意又拜金,系人听到都惊啦﹗搞到自己对爱情都放弃状态。

不过今次首尔之行,杜如风坦言都系买到傻,想知有咩好介绍就要留意节目。而今次佢仲会喺节目中首次尝试揸小型飞机,有畏高症嘅佢就话导演迫良为娼。
至于食方面,杜如风此行狂食酱油蟹,记得有次原本要对住镜头讲嘢拍摄,点知啲蟹一嚟到,佢一口气食咗八只完全冇讲过嘢系咁食。

观众同粉丝曾经一度好担心杜如风嘅肥肿难分,如今佢体重由130磅下降至104磅,足足减咗26磅,但又再次令人担心佢过瘦,杜如风强调之前因为湿疹严重,食药副作用所致,身体并无大碍,不过瘦又比人话瘦,肥又话肥,笑言大家好难服侍。

杜如风透露随住爸爸杜惠东离世,近年搬咗返屋企同妈咪同住,虽然唔习惯,但答应咗爸爸唔会同妈咪争执。讲到几时同妈咪去旅行?杜如风就话因为屋企有只好老嘅爱犬,成日都同妈咪讲等只狗死咗之后会带佢去旅行,不过如果同阿妈去旅行,就一定乜嘢都买唔到。

虽然爸爸已经离世多年,杜如风仍然会挂住爸爸,仲话爸爸生前写好多专栏,以前系行船,自己亦出过书,又钟意拍旅游节目,算系继承衣钵,佢只想个女认真工作,唔好挂住玩,佢已经愿望达成。

《跟风旅行团》11月16号起 星期一至五晚 21:30 翡翠台