张宝儿袁伟豪新居为袁氹氹庆生 举家亲子整蛋糕摆乌龙冇落蛋

袁伟豪 同 张宝儿 2020年结婚后一直恩爱非常,先后诞下大仔「袁咕碌」(袁晞祐)同细仔「袁氹氹」,两兄弟巧合地同样于11月出世,令每年11月都成为一家四口最热闹嘅庆生月!日前一家人乔迁入空间宽敞嘅新居重组幸福家园,张宝儿亦喺社交平台公开为袁氹氹庆祝1岁生日嘅温馨短片。


片段可见Bowie、阿Ben同即将踏入3岁嘅「袁咕碌」化身小厨师,于新居开放式厨房合力制作无添加香蕉苹果蛋糕。爸爸袁伟豪耐心抱住袁咕碌一齐搅拌香蕉泥、将面糊倒入烤盘压平,又一齐跪喺焗炉前期待蛋糕出炉,父爱满泻。

不过等等吓,Bowie就突然醒觉竟然犯下大乌龙——整个蛋糕由头到尾完全忘记「落蛋」,发现乌龙后Bowie更忍唔住自嘲话「服咗自己」,阿Ben亦哭笑不得,场面相当爆笑。虽然最终出炉嘅「无蛋版蛋糕」变成扁平香蕉饼,不过一家人就毫不在意,Bowie更笑言系「集齐全家爱意的无蛋蛋糕」。

家人亦纷纷向寿星仔袁氹氹派利是,收到利是后嘅小寿星双手合十道谢,非常可爱。切蛋糕前一家四口又齐声高唱生日歌一齐吹蜡烛。

即将踏入3岁嘅哥哥 袁咕碌 全程都非常疼爱细佬更极具家教,唔止进食前有礼貌讲出「我唔客气啦」,更逐一向同桌嘅外公、外婆、父母同细佬逐一叫食饭,精灵乖巧亦获网民大赞教导有方。而寿星仔袁氹氹试食后亦一脸满足。