参加《中年好声音4》再为外界认识嘅 可岚 即将推出新歌《下半场的呐喊》,月初生日嘅佢日前举行音乐会兼生日派对,邀请一班战友包括 高少华(阿银老师) 范子睿 郑家声 马浩宜 同 东成 以及艺人朋友 关浩扬 可宜 同 冯凯琪 等出席。身为「中国香港女厨师协会」会董嘅寿星更请得一众厨师好友同粉丝一齐开心欢度。
![]()
可岚演唱多首歌曲后,亦首次演绎即将推出嘅新歌《下半场的呐喊》。佢更分享参加《中声4》心路历程,坦言过程中因家事曾抑郁:「工人姐姐犯咗严重错误,令到细女皮肤二级灼伤,比赛后期再经历业主要求喺一个月内搬走,加上比赛压力,但喺屋企又要保持正面照顾仔女,比赛时面对外界又要保持笑容同仪态,𠮶种抗衡心态的确形成一种无形压力,令到自己好抑郁。」
虽然压力爆煲但佢仍觉有所得着:「有时候唔一定样样嘢都要OK,系可以同自己讲『It is okay to say not okay』,亦都唔需要每一刻都表现得咁坚强,偶尔承认自己有唔开心、有压力,都冇乜大不了。」![]()
与可岚比赛时份属队友嘅范子睿亦惊叹可岚系超强女强人:「我亲眼见佢处理大仔嘅问题,另一边厢又要比赛,最记得有次佢喺车上不停讲电话解决问题,我直头感受到佢𠮶种压力!」![]()
可岚仲特别感谢当时曾提供协助嘅东成:「我要多谢东成喺我赶住搬屋之际,为我提供海量嘅红白蓝袋!」之后两人合唱《你是你本身的传奇》。呢次生日派对亦由于佢嘅经历,所以替「全康澄心基金会」筹款,希望大家关注身心灵健康,可岚早前更为基金会慈善步行活动担任活动大使,身体力行宣传健康讯息。