方力申即将喺今个星期六(21号)再次挑战体能极限,展开35公里慈善港澳游,之后小方无缝接轨,抺干身即刻冲去参与一个慈善音乐会,完全系铁人级挑战。![]()
小方话最担心条脷,长时间浸海水,令条脷变肿,七年前游港岛后,条脷仲损咗,讲嘢都会唔清楚。小方赞音乐会主办方好好,本身预咗佢有跳舞部分,宜家未必需要跳,因为佢都担心自己跳唔到。![]()
小方呢次透露爸爸三个星期前突然中风,好在系冇爆血管清醒送医,最差情况系半边身郁唔到,目前已可以由护士扶住起身,慢慢行到几步。小方仲话可爱小Isla绝对系爸爸嘅灵丹妙药,每当爸爸见到孙女,把声会变得有返精神,加上两爷孙感情好好,Isla会爬向爷爷,同爷爷头贴头,小方睇到都觉得好感动。![]()
小方话呢三个星期每一日都会同细佬去医院探爸爸,希望鼓励爸爸。虽然爸爸一开始态度难免消极,但每次见到Isla,方爸爸开始积极面对。而小方亦将妈妈嘅辛苦看在眼中,时刻提醒妈妈要注意身体。![]()
下个月就系Isla一岁生日,小方都话时间过得好快,佢分享自己同家人有一个Daily Isla相册,每日会放一张Isla嘅相入去,宜家睇返啲相都觉得一年变化好大,好唔舍得囡囡大得咁快,好挂住Isla细少少嘅时候。