11月19日就系TVB嘅59周年台庆盛事,呢晚全台过百小生花旦倾巢而出,喺《万千星辉贺台庆》倾力演出。集团行政主席许涛向全台艺员抛出震憾弹,透露明年公司将会喺可容纳五万人嘅启德主场馆开骚,以及将会有五套剧一齐开,令全台上下感到好鼓舞。![]()
![]()
「捞家」罗嘉良阔别TVB 23年,呢晚强势回归,率领200位艺人载歌载舞,为演出打响头炮,唱出经典剧集《难兄难弟》嘅歌曲。捞家话呢一段真系非常精彩同热闹,而且大家要跳得齐整都好唔易。捞家喺彩排前,感到脚底麻痺同需要戴腰封,虽然On Show时都有啲唔舒服,不过佢就话最紧要观众睇唔出就得喇!![]()
![]()
至于压轴重头戏,就由出道40年嘅许志安担大旗演出。状态大勇嘅安仔,一连唱出多首经典金曲,台下一众艺员更挥动萤光棒,十足十睇演唱会一样。
安仔对上一次参与台庆,已经系1994年嘅事,当年安仔仲有份为阿姐伴舞《热咖啡》,佢都话呢段回忆令人深刻。呢晚佢同阿姐相隔30几年再喺台庆夜世纪重逢,除咗嚟个窝心拥抱之外,阿姐喺台上更为安仔送上鼓励,表示呢段路行嚟唔易,而安仔谦虚回应:「我会努力。」![]()
安仔呢晚难得现身,大家都少不免会将焦点放喺佢同马国明碰头呢件事上,不过安仔就话唔感到尴尬,件事亦过咗好耐,一切都顺其自然:「以前错过痛过沉淀过改过,而家最重要系做好自己嘅工作,对得住家庭就好足够,要向前望。」
每年台庆大抽奖均系万众期待嘅高潮环节,但幸运儿之一嘅黄剑文,竟然因为去买鸡髀而走宝,结果由另一位幸运儿肥妈补上,白白望住十万大奖同自己擦身而过,Kimman当刻嘅心情灰到爆,唔少人都戥佢好唔抵,车婉婉都有安慰Kimman。至于中声家族嘅陈芊芸就话,大家帮Kimman改咗个名叫「鸡髀文」。作为另一位幸运儿嘅肥妈都话多谢Kimman,但系佢都话打算拎笔钱出嚟同中声家族食咗佢。![]()
![]()
同系中声Family嘅颜志恒就喺「开口中」环节中,一人独揽45万信用卡免找数签账额,成为终极大抽奖嘅大赢家。Benson开心话之前同大奖擦身而过,个波一爆就觉得「到我喇」,而佢第一个谂起嘅就系离世冇耐嘅妈妈。因为妈妈都系11月19号生日,好似系妈妈喺天上保佑自己。![]()
另外,由陈炜、姚子羚、傅嘉莉及陈敏之四大索女率领30位女艺员表演嘅歌舞环节,一样令观众热血沸腾,演出后,大家成功解锁,开心到相拥落泪。炜哥就话大家排咗超过十日亦踩咗无数次台,呢日表演系最好嘅。子羚就觉得大家可以做到真系好唔容易,大家都唔系跳舞好叻嘅人,亦经历咗好多错败。![]()
中声家族呢晚亦嚟个实力大晒冷,肥妈带领几届中声唱将嚟个crossover,黄博同谭辉智更罕有上演火辣贴身舞。辉智事后澄清自己冇掂到博博大髀,所以博博老公唔使担心。![]()
除咗歌舞演出之外,张振朗、周嘉洛、朱敏瀚同刘颖旋,联同钱家班,展开一场高难度嘅动作及飞车演出,大显身手,并借此向一众幕后特技英雄致敬。
何广沛参与完台庆盛事后,佢又要开始为下个月嘅人生大事好好做准备,佢话放松心情嘅部分就要交俾「兄弟」陈晓华,Hera都话自己俾足情绪价值Matthew,可以纾缓紧张。![]()