台庆剧《下流上车族》将喺10月17号起，紧接《梦华录》推出， 新剧系有得才之称嘅林敏聪首次演出剧集之作，所以尚未开播就已经引起高度关注喇。出名搞笑嘅阿骢将联同饰演佢太太嘅江美仪，仲有两位靓女千金郭柏妍同罗毓仪演尽港人上车悲歌，剧中亦有好戏之人；金像影后鲍起静坐镇。
剧组日前公开两条宣传预告片，首条预告片中饰演车志明嘅阿骢，一改平时无厘正经本色，语重心长地道出港人上车悲歌话：「人与人之间最远嘅距离系咩？ 就系你睇到嘅靓楼，你买唔到、住唔起呀！」而亲情同人味亦系《下流上车族》嘅卖点，宣传片中出现阿骢爆喊镜头，又大抛押韵Bite：「间屋企几细唔系问题，最紧要一家人喺埋一齐！」
至于另一条宣传片，阿骢开首就一句「落错车14 年，我无时无刻都谂住买番间屋」相信已道尽唔少港人嘅心酸事，片中「车家」为咗上车各出奇谋，阿骢去果栏搬货赚钱、郭柏妍化身地产妹踩滑板派传单等。
不过当中最吸引应该系郭柏妍同罗毓仪齐齐以女仆Look去Cafe打工，造型非常可爱。之前凭《黯夜守护者》学生妹一角再惹关注嘅罗毓仪，今次喺台庆剧同样有唔少发挥机会，喺宣传片中一个女仔瞓天桥底之余，仲引嚟一班流浪汉围观，画面喜感十足。 阿骢今次除咗为「处男剧」粉墨登场之外，更亲自为剧集主题曲《一家人》作曲填词，仲邀请咗《声梦传奇》嘅Aeren文凯婷合唱。阿骢早前喺社交平台公开录音花絮，Aeren对阿骢紧张到狂搣手指。
而阿骢就自爆几乎赶唔切完成歌曲，佢话：「到咗最后𠮶日，我又有番少少灵感作到头𠮶几句，咁咪作埋佢啦。呢个贯彻到我创作风格，就系你畀一年我，我都系最后𠮶一日先做。」阿骢又大赞Aeren冇得顶，完全符合佢想要嘅感觉，又叫监制要揾Aeren拍剧。而Aeren就指今次同前辈合作令自己获益良多：「以前都系一班人录，今次感觉好唔同。」而《下流》嘅插曲同片尾曲亦同样由阿骢亲自操刀，即将会陆续公开。
《下流上车族》10月17号起 星期一至五晚 20:30 翡翠台