郑子诚同陆永主持《边度都有外星人》㖊晚播出𠮶集再请来「外星文明研究者」Tecki担任嘉宾，佢自言目睹过200多架次不明飞行物体，又话科学家Tesla系来自金星嘅生物，成为不少观众茶余饭后话题。
呢集主题讲麦田圈，即系一大片麦田，一晚之间忽然出现对称图案，曾出现喺英国、加拿大、法国同意大利等地，最大有300米，好多时喺古迹附近出现，中国近年都有报告，3年前喺青海盐湖出现麦田圈，原来有玄机，节目讲麦田圈系二进制符号，系外星人畀地球人嘅讯息，畀人知有外星文明，另一啲喺古迹出现，系要维护附近能量网格嘅磁场。
有传2020年5月英国出现一幅图案，Tecki表示系外星人提供畀人类COVID-19嘅解药，看似平平无奇嘅图案，原来隐藏病毒同制造疫苗讯息，牵涉SP8胺基酸物质，一种可以对付COVID-19嘅棘突蛋白（spike protein）；所谓有图有真相，今晚节目更播出2009年一段一分钟短片，一名英国人喺当地牛奶山，影到疑似两架UFO发光圆点，光点喺麦田上空盘旋，原本平整嘅麦田喺一分钟内出现一幅清晰图案，据闻系预示9大行星翌年嘅轨迹，另外，1974年有科学家将有关地球讯息发送上太空，估唔到事隔27年终于收到外星人回应。
