阔别红馆五年嘅Gigi梁咏琪，将会喺明年2月17同18号，再次踏红馆舞台开骚。日前Gigi为个唱拍摄海报，仲穿上连Lady Gaga同Jennie@BLACKPINK都同样钟情嘅设计师Simone Rocha所设计嘅鲜红色漆皮外套，令平日斯文嘅Gigi变得霸气十足。
Gigi今次嘅个唱以「时间」作为主轴，分为「昨天」、「今天」同「明天」三个部份，用歌声同乐迷分享呢几年间嘅成长同体会，所以演唱会就取名为『时间遇上我们』喇。「以前演唱会总会著公主裙，今次嘅造型好唔同，好似著住盔甲、武士道服装，件褛好重，但影出嚟好靓、好powerful、好sharp，亦都夹杂咗好浪漫嘅lace，好符合我今次想表达嘅主题。」
Gigi解释话：「以往会用庆祝方式去展开一个演唱会，但呢几年好多事情发生，我哋嘅舒适圈消失咗，你冇办法改变佢，但我哋可以用呢段时间，去做一啲我哋未做过嘅事，令时间同我哋重新接轨。我希望用一种比较接近剧场表演嘅方式，配合舞台、画面嘅设计，带大家一齐打开一个时间锦囊，去重温我多年嘅歌。」
至于会唔会同乖女Sofia母女档上场，Gig就i忍唔住大笑话：「佢好搞笑，当佢知道我开演唱会，就即刻问：『咁我呢？』，吓死我，以为佢想上台，原来佢担心要返学无得去睇，其实囡囡唔会上台啦，佢喺台下摇吓荧光棒，都会好开心。」
