50年代加入影坛嘅粤语片一代女王嘉玲，11月21日睡梦中喺泰国离世，享年87岁。消息由佢契女郭秀云向传媒公布。
嘉玲原名何佩英，上世纪50年代初投考电影公司演员训练班之后加入影圈，当时同四哥谢贤为同期同学，1955年嘉玲正式踏入影坛，首部作品《三妻奇案》一推出就一炮而红。
除咗同四哥齐齐拍摄唔少经兼粤语电影之外，后来仲发展成为真情侣，有指佢仲系四哥嘅初恋女友。嘉玲2006年接受沈殿霞主持节目《友缘相聚》访问，仲公开过佢哋拍拖时嘅细节同分手原因。
七年情因为「唔结就分」，同当红嘅四哥因为未达成家共识而无奈分手，而当时因为邀请嘉玲拍摄产品广告，后来力追嘉玲嘅泰国华侨 姚武麟 成为佢嘅真命天子，婚后嘉玲决定息影，随夫移居泰国曼谷，婚后育有两女一子。
身为嘉玲契女嘅郭秀云，就指约2019年起契妈受慢阻肺病之苦，身体状况一般，不时要靠仪器协助呼吸，平时亦大多卧床休息，闲时就以电视剧消遣。佢又指契爷身体情况亦普通，家人都非常担心，Sharon亦已买机票准备动身往泰国协助办理后事。
同嘉玲早年已经因为拍戏相识嘅胡枫，接受电话访问时就非常愕然，虽然知道对方身体抱恙，不过估唔到咁快就天人永隔。
刘丹出席活动时，亦都对当年明星足球队访问泰国，嘉玲同丈夫嘅款待有好深印象，更大赞当年嘉玲系大众女神，就算当年见面一样富有气质，虽然夫妇生意庞大，不过一样待人以诚有礼，非常值得敬佩。
