《J2ers：不正常爱情研究所》今集会同大家一齐探讨近年结婚异性嘅大热方式之一：「Speed Dating」(快速约会)， 仲邀请到快速约会公司创办人Yubi担任嘉宾。 各位主持配合今集主题，都以心水约会战衣现身，再接受嘉宾Yubi品评。
佢首先大赞Jojo嘅露腰小背心、牛仔短裙配合凸显女性线条，完全值得加分、而Karen嘅露肩装，食饭时候可以吸引到男士注意，而Karen拣露肩长裙充满机心，喺节目入面会详细解释。至于Susuca选择嘅黑色系百搭色调，仲令佢有一份神秘感，不过Yub就提大家著暖色系衣服应约，又提醒男士们话︰「初相识时间，头三次同女仔约会，最好著有领、有袖恤衫。」
Alan讲到已单身3年，觉得Speed Dating概念啱晒自己，佢话︰「其实我冇试过， 不过idea好吸引。可以轮流同唔同女仔倾计，选择性多咗。好open mind表明我嚟呢度就系揾女朋友，机率又大咗。有考虑过有兴趣嘅。」心仪文静但又会参加唔同活动女性嘅佢，仲话择偶要求自律性强：「可以管到我，因为自己比较懒」。
而节目开始之前，主持又要填写一份参加「快速约会」嘅表格，除咗年龄、身高、 收入、自置或租住物业等基本资料之外。仲会问埋「有冇生育打算」、「有冇信心告别单身」同「觉得自己外表如何」等问题。Yubi就话系为分析申请者性格方便配对喇，佢话由答案可以睇出Jojo 同Susuca两人有好高能量、钟意玩而且可以一心几用， 正系大部份男士都喜欢嘅类型。以九型人格分析，佢哋系属于做人有目标同自信嘅七型人格(The Socializer)。
节目中Yubi亦提到唔少有趣个案，好似医生同约会对象嘅话题竟然系「屎尿」、A0女仔被「浪漫偶像剧洗脑」以为世界上充满好多白马王子，更多详细内容，就要留意听晚播出嘅《J2ers︰不正常爱情研究所》喇。
