英皇电影《望月》由罗耀辉导演及监制，李丽珍、李靖筠（Gladys）、陈湛文（Peter）、芯駖等领衔主演，日前电影举行开镜仪式，由英皇集团主席杨受成亲自主持，罗耀辉导演率领戏中主角李丽珍、李靖筠、陈湛文等整齐列阵，诚心祈求拍摄顺利，上画叫好叫座！
李丽珍喺戏中育有一仔一女，分别由陈湛文及李靖筠饰演，长子已成家立室（芯駖饰演陈湛文妻子），为切合角色需要，珍妹特别增肥17磅，令自己睇落更似圆润嘅中年妈妈，专业精神可嘉，虽然只系刚刚开工，但李丽珍跟陈湛文及李靖筠等一班拍档已相当熟络，李靖筠暱称珍妹为「妈子」，珍妹笑言：「有啲感觉李靖筠就系我个女儿，自己会投入一啲，佢话头醒尾，有个咁样嘅女，我会好『冧』！」
李靖筠首度与珍妹合作便结下母女之缘，李靖筠感到非常荣幸：「能够演珍姐个女，实在太幸运！记得有一场戏，我要翻开『妈子』啲旧相，佢真系好靓！而且跟『妈子』合作好开心，佢系好随意嘅人，偶尔讲吓冷笑话，几搞笑！」
现实中，珍妹与乖女许倚榕感情融洽，相处似朋友咁，珍妹谦言冇咩教女心得：「主要系畀佢多啲爱心，主动去关心佢，唔好等到阿女反叛时先管教，要努力维系彼此感情与关系。」李靖筠自爆曾向珍妹探问与女儿嘅相处之道：「我几羡慕『妈子』与女儿嘅关系，因为我出自比较传统嘅家庭，好难与父母搭住膊头倾心事。」珍妹系叛逆少女角色嘅代表人物，喺珍姐眼中，李靖筠有几分叛逆嘅影子，珍妹评价：「Gladys可以好纯品，但又可以做寸寸地的角色，好多样化！」
开镜当日，珍妹左脚扎住纱布，以拐杖代步，原来佢不慎喺屋企跌伤，珍妹苦笑道：「因为自己轮尽，我呢生人跌过好多次，以今次最『甘』！喺屋企滑倒时，刚巧跌正喺隔开厕所与房间嘅云石石壆，只脚不单止拗柴，仲碎咗少少骨，希望唔好再有下次。」
在开镜前伤脚，珍妹一度担心影响拍摄工作，幸好罗耀辉导演可以迁就，先拍屋企食饭等较静态嘅戏份，珍妹说：「戏中我生咗两个廿几岁嘅仔女，估计角色接近五、六十岁，就算拿著拐杖都问题不大。」珍妹指医生睇过伤势并冇大碍，再过多两星期便可康复。
陈湛文与芯駖喺《望月》合演一对感情不算和睦嘅夫妻，陈湛文打趣道：「我成日演被女人『骑住』嘅角色，走唔甩！」佢喺《饭戏攻心》演废青三佬深入民心，呢次喺《望月》变身沉郁内敛嘅大佬，相比喜剧与正剧，陈湛文坦言偏爱正剧：「感觉正剧比较有发挥一啲，加上我本身性格几内敛，跟呢个角色有点连系。」陈湛文演戏经验丰富，可以教吓初登大银幕嘅芯駖，首次见面时，芯駖已急不及待向陈湛文请教演戏心得，陈湛文虽然乐意分享，却又有所顾虑，怕畀咗啲山埃贴士，而芯駖则大赞珍妹好有气场，芯駖有默默观察珍妹一举一动，留意谈话嘅节奏、语速、尾音从中偷师。