陈十三作品《我和僵尸有个约会》三部曲系列，首部曲喺1998年播出，呢部永恒之作相隔24年再次登场，由陈十三延续经典，身兼编剧及导演开拍电影版《驱魔龙族马小玲》，沿用《僵尸》原有角色人物及都市奇幻题材，以全新演员阵容亮相!
当年《僵尸》三部曲系列由尹天照演「况天佑」、万绮雯演「马小玲」、杨恭如演「王珍珍」，而全新电影版就由黄宗泽饰演「况天佑」、「马小玲」为吴千语、「王珍珍」为蔡洁，相关演员阵容名单早前传出后，讨论度甚高，特别系吴千语做「马小玲」更具争议。其实电影版角色极多，另一重要角色「金正中」当年由杜汶泽演出，今次改由凭《缘路山旮旯》杀出千万票房嘅岑珈其接棒。
岑珈其月前喺《我和僵尸有个误会》剧场版曾扮过「金正中」，获不少网民称赞还原度高，陈十三觉得岑珈其非常脗合角色，决定邀请岑珈其参演。
岑珈其日前刚喺马来西亚拍完电影《千谎百计》返港，随即投入《驱魔龙族马小玲》拍摄，岑珈其演「金正中」与电视版嘅不同，电影版「金正中」系不学无术嘅宅男，只想做网红，谢雪心饰演其母亲，岑珈其说：「成日同阿妈 (心姐) 讲谂到啲好主意，我哋拍条片就成功就会爆红，成日唔想努力，阿妈就想佢揾啲嘢学下。」
岑珈其以「玄武童子」造型拍戏：「系讲我好叻、识法术，但其实系扮，但过程我扮得好有自信好犀利，其实平时嘅『金正中』系冇乜自信，又懒，乜嘢都唔叻嘅一个𡃁仔，」
岑珈其细个都有睇过《我和僵尸有个约会》，「系我儿时一套经典到爆嘅电视剧，黐线，觉得点解可以咁劲嘅」，岑珈其直认𠮶时会追睇，但唔识得细味成套剧，但都会谂点解识得谂呢啲题材嘅，僵尸好型㖞，佢都几钟意，岑珈其最钟意电视版《僵尸》嘅「马小玲」，觉得呢个角色经典又吸引。
剧集版「金正中」母亲由吴浣仪演出，电影版金母角色就由心姐饰演，心姐称其角色太溺爱儿子，「系锡到有啲纵，因为家庭环境好现实，老豆又唔生性，独力凑佢供书教学，点知佢想做网红，咁我又随佢癫好帮佢，但我哋都系唔叻嘅神棍，揾唔到钱，都几得意。」心姐称导演陈十三以前创作《僵尸》无人不识，今次自己有缘参演亦感开心。