全城期待嘅TVB歌唱真人骚《中年好声音》，经过多轮竞争激烈嘅面试后，选出100强参赛者，于周日11月27号首播，100强参赛者届时背对评判献唱，凭靓声争夺50强席位，正所谓高手在民间，唔少参加者的确唱得不错，歌声中充满故事。
「屯门娜娜」董幸儿声称因网民呼唤而参赛，有份喺首集出战，获得成日去公园捧场嘅Happy伯联同街坊们前来支持，「屯门娜娜」觉得好感动，Happy伯更专登戴粉红色帽衬「屯门娜娜」嘅粉红色头发。
「黑妹」李丽霞虽然话唔赞成女儿蔡颖秋参加，不过爱女首集出战，佢都惊喜现身支持，仲同评判伍仲衡鸡啄唔断，蔡颖秋指妈咪一直教佢练歌要努力：「由通知佢到而家只系两、三个礼拜，佢又忙，我又有自己嘢要做，变咗好难夹时间畀佢教，只可以电话隔空讲，佢不时叫我放开啲。」
李玟家姐李思林轻松迎战，原来大家姐有低调支持，李思林笑言细妹李玟冇畀压力；曹敏莉细妹曹敏宝获老公到场支持追梦，同时多谢家姐曹敏莉鼓励，曹敏莉主动问细妹畀《中年好声音》门票。
曾做歌手嘅周吉佩唔敢请亲友撑场，期待入围一同见证，而支持者众多嘅冯文，原来佢老公早于2019年参加《中国好声音》入围广州海选40强，冯文坦言因老公当时展现嘅勇气，令佢有胆参加呢个比赛。
