黎耀祥、龚慈恩主演嘅新剧《轻・功》探讨「生死」与「放下」等问题，6号晚播出号一集，讲到龚慈恩饰演嘅缪妙喺黎耀祥饰演嘅十一怀中离世，当时十一以不舍嘅眼神揽住爱妻，虽然画面上冇呼天抢地嘅喊戏，但系呢种淡淡嘅哀愁，反而令到观众有种揪心嘅痛。
提到呢场离世戏，龚姐话因为祥仔拍摄前畀咗好多交流佢，令拍摄时相当顺利，龚姐又话可以死喺自己最爱嘅人怀中，加上有咁多爱锡，其实系好恩惠，讲到剧集探讨生死同放下嘅议题，龚姐就相当感触：「遇到任何遭遇都好，只要豁达啲去谂，总系会有出路。同埋生命嘅质同量同样重要，大家要珍惜身边所有嘢，每个人都应该有自己嘅理想，要努力去追求。」
而7号晚播出号一集，十一因一啲原因而危站高处，令一众好友同仔女都吓到半死，为咗配合剧情，祥仔拍摄当日需要企喺山崖边嘅栏杆上拍摄。我哋当日直击拍摄现场，亲身上阵嘅祥仔正式埋位前认真咁排练，态度非常专业，祥仔话：「开头就惊比较危险，剧组都有 Book 定替身，但嚟到见到觉得还可以，好彩我唔畏高，我接受到嘅。」佢又话拍摄当日最辛苦嘅唔系拍 危跳镜头，而系一班演员需要爬长长嘅楼梯先可以去到拍摄场地，饰演祥仔大女嘅蒋祖曼，仲笑言：「大家连饮嘢都唔够胆饮，因为唔想行番落去去洗手间。」而演细仔嘅朱敏瀚就被赞系体力最好嘅一个，佢仲帮手将工作人员啲机器搬上山，认真抵得谂呀。
《轻・功》逢星期一至五 21:30 翡翠台
