TVB综艺歌唱真人骚《中年好声音》，逢周日晚九点半于翡翠台播映，由车婉婉担任主持，圣诞继续有《中年好声音》睇，Keep住团火唔好畀佢熄！
周日（25日）晚一集，继续进行第二部曲《挑战！两个只能活一个》，将有19名选手出场，当中更有4位勇夺5盏灯佳绩。上回合嘅其中一位5盏灯得主周吉佩（吉吉），是集因一个匪夷所思决定，搞到大家𢱑晒头！事缘选唱炎明熹《复杂》嘅吉吉，由于表现失准需接受台下选手挑机，但吉吉竟然出乎意料地拣实力者「小龙女」龙婷做对手，吓到全场O晒嘴，伍仲衡直言：「做咩拣佢，你自杀咩！系咪想唔玩呀？」肥妈则抛出一句：「你都Short Short哋！」
龙婷于2017年称霸旺角行人专用区，2019年时参加央视举办嘅《星光大道》，勇夺该年度总冠军，龙婷以邓丽君腔见称，今集献唱张惠妹嘅《我最亲爱的》，到底能否挑战成功？吉吉又点解好拣唔拣拣著实力者龙婷？呢个星期日自有分晓。
是集观众较为熟悉嘅选手分别有李玟胞姐李思林、陈欣健女儿陈早怡及邝文珣老公应德荣。李思林选唱《明星》，并透露呢首系妹妹李玟最爱嘅一首歌：「CoCo（李玟）开演唱会永远都会唱呢只歌，因为佢从来冇见过爸爸，佢唱呢首歌好似同爸爸讲『我依家喺台上表演喇』。」
李思林特意改咗部分歌词，借此向妹妹尽诉心中情，佢哽咽：「我哋细个好艰难，成日见唔到妈妈，因为佢要揾食养大三个小朋友。我哋遭人白眼时都会一齐望住啲星星，今次拣呢首歌，系想话畀佢（李玟）听我想做佢嘅星星。」
46岁陈早怡自封「高敏」人士，佢接受制作组访问时透露：「我个人好易唔开心、好自卑，觉得自己唔系好适合唱歌同幕前工作，屋企人都知我性格好敏感，担心我承受唔到负评，但系爸爸任何情况只系同我讲『I Love You』、『I Support You』，好多谢佢哋嘅关心。」陈早怡献唱莫文蔚嘅《爱》获肥妈称赞唱得有感情。
52岁应德荣则献唱陈晓东嘅《这种年纪》，该歌作曲者正系评审之一嘅伍仲衡。到底以上三人可唔可以凭住好声音成功晋级？记得留意新一集！
《中年好声音》逢周日晚九点半翡翠台播映。