一连6集全新节目《做节必食18道菜》今晚起播出，除咗有三位星厨 黄亚保 萧秀香 同 祈积奇坐阵之外，仲有大批嘉宾艺人参与，好似 黄翠如、萧正楠、蒋家旻、谭俊彦、 陈自瑶、刘颖旋、何依婷、陈敏之、黎诺懿、江嘉敏、戴祖仪、区永权、伍仲衡、何广沛、 郭子豪同余思霆等。
三位星厨将兵分三路，带领唔同组别嘅嘉宾艺人，拜会唔同主题嘅地方菜馆，搜寻必食18道菜，仲会走入厨房重地向餐馆主厨「偷师」。 今个星期三姐、保哥同祈积奇，就会带领陈敏之+黎诺懿、萧正楠＋区永权+伍仲衡 仲有 黄翠如+陈自瑶，品尝潮州、顺德、客家，仲有福建三大地方嘅新春名菜。
其中潮洲必食新春菜就有「金银蝴蝶大鹰鲳」、「黄皮炆隆江猪手」、包含18种食材嘅「潮州围炉」。而顺德同 客家必食新春名菜为「独占鳌头」(煎焗鱼嘴)、「客家碌鹅」、「猪网油酿金蚝」。福建必食新春名菜就有「佛跳墙」、「福建五香卷」同埋「至豪海蛎六福宴」。
由于三组艺人都老友鬼鬼，所以气氛相当热闹喜庆，而三个组合当中，以第二集嘅萧正楠、区永权同伍仲衡最为百厌。当佢哋品尝煎鱼嘴时，伍仲衡就被区永权老点，仲讲错话：「人嘴我日日都锡架啦。」仲被区永权同萧公子踩台： 「新春佳节，冇人有兴趣听呢啲嘢！」
之后Harry就还击指Edwin欠才华兼要减肥，Edwin亦寸Harry食嘢唔做嘢。之后仲邀请保哥欣赏佢哋即将举行嘅演唱会，保哥仲爽快答应，仲会上台表演打鼓咁话。呢集另一亮点系萧公子即席跟大师傅学煎鱼嘴，见佢有板有眼，卖相亦金黄可口，令平时惯性踩台嘅「臭口二人组」Albert同Harry都忍唔住大赞好味。
至于在第三集亮相嘅萧太黄翠如，佢嘅「地狱厨神」宝座继续稳如泰山，当同好友Yoyo学做福建五香卷时，翠如竟将圆柱体包成「正方大饼」，外观相当赶客； 搞笑嘅佢仲将失败作品硬塞Yoyo口中，吓到 Yoyo大嗌佢变态。
而Yoyo品尝人生第一道佛跳墙时， 唔止盛装打扮现身，试煮期间仲不停将美味材料放落自己嘅专属炖盅。事后劲搞笑解释话：「因为我好悭，佛跳墙好贵我唔舍得食呀！」起筷前仲话自己「口水已流到落心口」，馋相尽出非常可爱。
《做节必食18道菜》星期一至三晚 22:30 翡翠台