杨证桦喺台庆剧《超能使者》饰演「高佬」发挥超班演技，两父子一场催泪生离死别戏，令人动容，杨证桦日前接受TVB娱乐新闻台《星光路上》主持潘盈慧访问，畅谈当年童星身份入行，其父更系汪明荃嘅艺员训练班同期同学，后来爸爸移民到美国定居，杨证桦细个听到爸爸讲故事，从而觉得娱乐圈好吸引。
杨证桦第一次演出就系拍《阔少爷当差》，当时麦德罗曾推荐杨证桦做舞蹈艺人，佢十几岁一边跳舞一边拍剧，后来杨证桦曾参加第15届新秀歌唱大赛纽约选拔赛胜出，一直好想入行，最终杨证桦冇参加香港新秀，直接入读训练班做旁听生，其后加入TVB，由启蒙老师罗冠兰教做戏。
杨证桦曾畀自己一个限期，若果未能「达标」，一度想过转行返美国做理发，但系杨证桦发现自己越做越钟意演员呢个工作，觉得做演员系终身职业；杨证桦喺《巾帼枭雄之义海豪情》饰演宫崎少佐，佢本身唔识日文，不过杨证桦于剧中好多对白要讲日文，只好胆粗粗试吓，当时监制李添胜见佢做得几好，曾致电好奇问佢系咪识日文，得到呢个评价令杨证桦非常开心，隔咗几日，添哥又再联络佢，叫佢演祥仔同雯女喺集中营𠮶场有成8、9场戏，足足几页纸日文对白，佢努力把握机会尽做，令观众印象深刻。
杨证桦近排喺台庆剧《超能使者》饰演「高佬」，记得当初监制文伟鸿同佢讲呢个故事𠮶阵，杨证桦已觉得故事好凄凉，未睇剧本已经想喊，要keep住情绪低落，拍出嚟先有呢个感觉。杨证桦称好钟意演纪律部队，自言爱守规矩，有时开工过份认真，唔想嘻嘻哈哈浪费时间，连同事都好奇问佢使唔使咁样，杨证桦喺屋企亦系严父，对小朋友管教甚严。
