由谢雪心、蔡国威、梁凯晴及阮嘉敏担任主持、一连六集嘅贺年节目《新春开运王》，今（17日）晚起逢周一至周三晚上十点半翡翠台播出，《新春开运王》每集邀请唔同艺人担任嘉宾，仲有邀请玄学家李丞责、麦玲玲、陈定帮及元海为大家指点迷津，各师傅将带大家游走香港各个风水宝地行大运、食遍开运菜及分享兔年十二生肖运程。
戴耀明被批命格极端
今（17日）晚呢集，有久违嘅朱咪咪担任嘉宾主持，由麦玲玲师傅带领大家去中环行大运。玲玲师傅指坐南向北嘅中环属纯阳之地，理应旺日唔旺夜，而夜夜笙歌嘅兰桂坊却恰好相反，个中甚有玄机。
「新春开运菜」环节则揾嚟视帝谭俊彦（Shaun）、绿叶王戴耀明呢对好兄弟担任嘉宾，二人当年因拍摄《天命》结缘成为好友，玲玲师傅指命格多金嘅谭俊彦系义气仔女，年冲月又冲嘅小明则命格较为极端，适宜「走多啲」及「越唔稳定运就会越好」；惟小明多年来因一个原因一直安份守己。
谭俊彦喺节目中将揭开个中因由，背后大有洋葱！玲玲师傅又指小明于兔年将遇上60年一次嘅「天合地合」，适宜作重大决定，到底相关决定系咪与结婚有关？谭俊彦生命中更出现咗一个重要嘅贵人，助佢由运程平平变得一帆风顺，究竟呢个贵人系边个？就要密切留意！
听晚呢集继续由朱咪咪担任嘉宾主持，并由李丞责师傅带大家到流浮山赏花、赏锦鲤、观鸟同BBQ，原来上述活动皆有助提升运势。丞丞师傅更会带大家于香港寻龙点穴，兼摸真‧龙骨沾沾旺气，相当过瘾。
听晚𠮶集视后胡定欣与好姊妹姚子羚将一同享用「新春开运菜」，透过拣食品及写挥春让丞丞师傅预测兔年运程。两位靓女来年事业运相当唔错，惟姻缘各异，其中一人被批情路上仍须努力，另一人则两心连结，到底系边个感情有着落？记得留意《新春开运王》。
《新春开运王》逢周一至三晚上十点半翡翠台播映
